कोल्हापूर : प्रसारमाध्यम न्यूज
भारतीय रेल्वे आता आरक्षण तक्ता अर्थात रिझर्व्हेशन चार्ट गाडी सुटायच्या २४ तास आधी तयार करण्याचा विचार करत आहे. रेल्वे लवकरच हा नियम लागू करू शकते. सध्या हा आरक्षण तक्ता गाडी सुटायच्या ४ तास आधी बनवला जातो. त्यामुळे बऱ्याच प्रवाशांना वेळेवर तिकीट मिळत नाही. मात्र नवा नियम लागू झाल्यास रिझर्व्हेशन चार्ट ४ तासांऐवजी २४ तास आधी बनवला जाईल. २४ तास आधी तक्ता बनल्यास प्रवाशांना त्यांच्या प्रवासाचं नियोजन करणं सोपं जाईल. चार्टमध्ये नाव नसल्यास प्रवाशांना तिकीट काढायला पुरेसा वेळ मिळेल. रेल्वेच्या या निर्णयामुळे प्रवाशांना नक्कीच फायदा होईल.
सध्या रेल्वेकडून रिझर्व्हेशन चार्ट ट्रेन सुटण्याच्या चार तास आधी लावला जातो. या चार्टमध्ये ज्या प्रवाशांची नावं नसतात त्यांना शेवटच्या वेळी मोठा मनस्ताप सहन करावा लागतो. त्यामुळे जर २४ तास आधीच रिझर्व्हेशन चार्ट तयार केला, तर चार्टमध्ये नाव न आलेल्या प्रवााशांना दुसऱ्या पर्यायाचा विचारा करता येईल. शेवटच्या क्षणी येणारा ताण टाळण्यास या नव्या २४ तास आधी रिझर्व्हेशन चार्टची मदत होईल. यामुळे प्रवाशांना एक दिवस आधीच त्यांच्या प्रवासाचा पुनर्विचार किंवा पुनर्नियोजन करण्यास वेळ मिळेल.
रिझर्व्हेशन चार्टमधील उरलेल्या सीटचं काय होतं?
सध्याच्या नियमानुसार, प्रवासी चार्ट ट्रेन सुटण्याच्या चार तास आधी किंवा पहाटेच्या गाड्यांसाठी आदल्या रात्री तयार केला जातो. तर फायनल चार्ट ट्रेन सुटण्याच्या ३० मिनिटं आधी जारी केला जातो. फायनल चार्टमध्ये न गेलेल्या सीट जनरल किंवा तात्काळ कोट्यात पुन्हा वाटप केल्या जातात.
