प्रसारमाध्यम / दिग्विजय माळकर
नॉर्वे आणि फ्रान्स यांनी संरक्षण सहकार्य अधिक मजबूत करण्यासाठी महत्त्वपूर्ण करारावर स्वाक्षरी केली आहे. या करारानुसार नॉर्वे फ्रान्सच्या नेतृत्वाखालील अण्वस्त्र प्रतिरोधक कार्यक्रमात सहभागी होणार आहे.
पॅरिस येथे झालेल्या संयुक्त पत्रकार परिषदेत फ्रान्सचे राष्ट्राध्यक्ष इमॅन्युएल मॅक्रॉन आणि नॉर्वेचे पंतप्रधान जोनास गहर स्टोअर यांनी या निर्णयाची घोषणा केली.
“द्वितीय महायुद्धानंतरची ही सर्वात गंभीर सुरक्षा परिस्थिती आहे,” असे मत स्टोअर यांनी व्यक्त केले. त्यांनी सांगितले की, गेल्या सहा महिन्यांत नॉर्वेने जर्मनी आणि ब्रिटनसोबत संरक्षण करार केले असून आता फ्रान्ससोबतही व्यापक संरक्षण करार करण्यात आला आहे.
मार्च महिन्यात मॅक्रॉन यांनी युरोपातील सुरक्षेला बळ देण्यासाठी फ्रान्सच्या अण्वस्त्र साठ्याचा वापर करण्यासंदर्भातील योजना जाहीर केली होती. फ्रान्स हा युरोपियन युनियनमधील एकमेव अण्वस्त्रधारी देश आहे.
‘फॉरवर्ड न्यूक्लिअर डिटरन्स’ या योजनेअंतर्गत सहभागी देशांना फ्रान्सच्या “स्ट्रॅटेजिक एअर फोर्सेस” तात्पुरत्या स्वरूपात तैनात करण्याची परवानगी दिली जाईल. त्यामुळे युरोपभर संरक्षणात्मक उपस्थिती वाढून संभाव्य शत्रूंच्या रणनीती गुंतागुंतीच्या होतील, असे मॅक्रॉन यांनी स्पष्ट केले.
नॉर्वेपूर्वी बेल्जियम, डेन्मार्क, जर्मनी, ग्रीस, नेदरलँड्स, पोलंड, स्वीडन आणि ब्रिटन या देशांनी या कार्यक्रमात सहभाग घेतला आहे.
या करारामुळे संरक्षण नियोजन, संयुक्त लष्करी सराव, उपकरणांची पूर्वतयारी, सागरी सुरक्षा, सायबर सुरक्षा, अवकाश सहकार्य, हायब्रिड युद्ध आणि युक्रेनला मदत अशा विविध क्षेत्रांत दोन्ही देशांमधील सहकार्य वाढणार असल्याचे स्टोअर यांनी सांगितले.
