पुणे : विशेष प्रतिनिधी
महाराष्ट्राच्या संत परंपरेचा वैभवशाली वारसा लाभलेला संत तुकाराम महाराज ( देहू ) आणि संत ज्ञानेश्वर महाराज (आळंदी ) यांचा पालखी सोहळा आज दुपारपर्यंत पुणे शहरात प्रवेश करणार आहे. या अध्यात्मिक पर्वणीसाठी पुणेकर भाविक मोठ्या संख्येने सहभागी होणार असून, त्यांची गर्दी लक्षात घेता पुणे वाहतूक पोलिसांनी व्यापक नियोजन केले आहे. वाहतूक ट्रॅकिंग, पोलीस रायडर, पर्यायी मार्ग आणि अंतर्गत वाहतूक बदल अशा बहुआयामी उपाययोजना करण्यात आल्या आहेत.
पुणे शहरात संतांची पालखी येते म्हणजे भाविकांसाठी एक भक्तिभावाने भरलेला सोहळा असतो. ज्यांना पंढरपूर वारीला जाता येत नाही, त्यांच्यासाठी पालखी पुण्यात असलेली काही क्षणं म्हणजेच आषाढी एकादशीचा साक्षात अनुभव असतो. त्यामुळे शहरातील विविध भागांमधून हजारो नागरिक आज पुण्यात दाखल होणार आहेत.
भाविकांना सोयीसाठी पुणे वाहतूक पोलिसांकडून पालखी ट्रॅकिंग सुविधा उपलब्ध करून देण्यात आली आहे. यामुळे संत तुकाराम महाराज आणि संत ज्ञानेश्वर महाराज पालखी सध्या कुठे आहे, पुढचा मुक्काम कुठे आहे, याची माहिती Google Maps किंवा अधिकृत वेबसाईटवरून थेट पाहता येणार आहे.
यासोबतच “पोलीस रायडर” पथक देखील तैनात करण्यात आले असून, हे रायडर प्रत्येक टप्प्यावरून माहिती अपडेट करत आहेत. त्यामुळे Live अपडेटच्या मदतीने भाविकांना योग्य वेळी योग्य ठिकाणी पोहचता येणार आहे.
पर्यायी मार्ग आणि वाहतूक बंदी
पालखीच्या मार्गावर गर्दी व वाहतूक कोंडी टाळण्यासाठी पुण्यातील मुख्य रस्त्यांसह अंतर्गत रस्त्यांमध्येही वाहतुकीत बदल करण्यात आला आहे. काही मार्ग तात्पुरते बंद तर काही मार्ग पर्यायी वाहतुकीसाठी खुले ठेवण्यात आले आहेत.
पर्यायी मार्ग उपलब्ध असलेले मुख्य रस्ते :
-
देहू/आळंदी मार्गापासून संगमवाडीपर्यंतचे प्रमुख टप्पे
-
मोठ्या चौकात विशेष नियोजन सिग्नल वळवणं, मार्ग बदल
वाहतूक बंद करण्यात आलेले व बदललेले अंतर्गत रस्ते :
-
फर्ग्युसन महाविद्यालय रस्ता (F.C. Road)
-
रेंज हिल ते संचेती चौक
-
डेक्कन ते कोथरूड
-
लक्ष्मी रोड ते बेलबाग चौक
-
शिवाजी रोड, डेक्कन वाहतूक विभाग ते आपटे रोड
-
गणेशखिंड रोड व आसपासचे मुख्य मार्ग
भाविकांसाठी सूचना :
-
शक्यतो सार्वजनिक वाहतूक (PMT, मेट्रो) चा वापर करावा
-
वाहतूक पोलिसांच्या सूचनांचे पालन करावे
-
पालखी ट्रॅकिंगचा वापर करून गर्दी टाळून दर्शनाची व्यवस्था करावी
-
Live अपडेट्ससाठी पुणे ट्रॅफिक पोलीसचे सोशल मीडिया फॉलो करावे
पुणे शहर आता संतांच्या चरणस्पर्शाने पावन होणार आहे. शहराच्या रस्त्यांवर संतांच्या अभंगांचा गजर, टाळ मृदुंगाचा नाद आणि हजारो भाविकांची भक्तिभावपूर्ण उपस्थिती अनुभवायला मिळणार आहे.
“वारी ही केवळ चाल नाही ती चालत असलेली अध्यात्माची शाळा आहे. पुणेकरांसाठी ही एक दिव्य संधी आहे.
——————————————————
