कोल्हापूर : प्रसारमाध्यम न्यूज
कोल्हापुरात आज सकाळपासून पावसाने झोडपायला सुरुवात केली आहे. हवामान विभागाने केलेला अंदाज सार्थ ठरवत पाऊस एकसारखा आणि जोरदार पडत आहे. कोकण किनारपट्टीवरही आज जोरदार पावसाची शक्यता असून पुणे, सातारा व कोल्हापूर घाट माथ्यावरही येलो अलर्ट देण्यात आलाय.
भारतीय हवामान विभागाच्या अंदाजानुसार, बंगालचा उपसागरावर सध्या चक्राकार वाऱ्यांची स्थिती सक्रिय आहे .येत्या 24 तासात हे वारे वायव्य दिशेला सरकणार असून वायव्य बंगालच्या उपसागरावर कमी दाबाचा पट्टा तयार होणार आहे . त्यामुळे मध्य महाराष्ट्र कोकण व गोवा किनारपट्टीसह मराठवाडा व विदर्भात तुफान पावसाची हजेरी लागणार आहे . गेल्या महिन्याभरात महाराष्ट्रात पावसाचा जोर वाढलेला होता .आता सप्टेंबर महिन्याच्या सुरुवातीलाही हा जोर कायम राहणार आहे.
देशाच्या अनेक भागात सध्या मुसळधार पाऊस सुरू आहे. विशेषतः उत्तरेकडील राज्यांमध्ये म्हणजे जम्मू काश्मीर, हिमाचल प्रदेश, पंजाब ,हरियाणा ,चंदीगड या भागात प्रचंड पावसासह वादळी वारे वाहत आहेत. दरम्यान आजपासून राज्यभरातील पावसाचा जोरही वाढणार आहे. आज मराठवाडा विदर्भ उत्तर महाराष्ट्र तसेच कोकण किनारपट्टीवर जोरदार पावसाचे अलर्ट देण्यात आले आहेत. पुणे सातारा व कोल्हापूर घाटमाथ्यावर पावसाचा येलो अलर्ट आहे .
.हवामान विभागाच्या अंदाजानुसार, समुद्राच्या तळाशी सुरू असलेल्या मान्सूनच्या द्रोणीय परिस्थितीमुळे कमी दाबाचा पट्टा तयार होत आहे. राजस्थानच्या मध्य भागामध्ये चक्राकार वाऱ्याची स्थिती आहे. दोन सप्टेंबर पासून बंगालच्या खाडीवर नव्याने कमी दाबाचा पट्टा तयार होण्याची शक्यता आहे . त्यामुळे देशाच्या विविध भागात जोरदार पावसाची हजेरी लागणार असल्याचा हवामान विभागाने वर्तविली आहे.
पुढील सात दिवसात गुजरात तसेच कोकण व गोवा मध्य महाराष्ट्र तसेच मराठवाडा भागात तुफान पावसाची शक्यता आहे .दोन व तीन सप्टेंबर रोजी कोकण गोवा मध्य महाराष्ट्र तसेच मराठवाड्यात मुसळधार पावसाची शक्यता असून तीन-चार व पाच सप्टेंबर रोजी कोकण व गोवा तसेच मध्य महाराष्ट्रात अति मुसळधार पावसाची शक्यता आहे .
——————————————————-
