Albania's world's first AI Minister, 'DIELA', recently gave his first speech in parliament. Listening to this speech, the entire world's attention has turned to Albania.
तिराना : प्रसारमाध्यम वृत्तसेवा
जगभरात कृत्रिम बुद्धिमत्तेचा ( AI ) प्रभाव वाढत असताना आता राजकारणातही एआयचे पदार्पण झाले आहे. अल्बानियाने जगातील पहिला एआय मंत्री नेमण्याचा ऐतिहासिक निर्णय घेतला असून, ‘डिएला’ ( DIELA ) या नवीन एआय महिला मंत्र्याने नुकतेच संसदेत आपले पहिले भाषण दिले. डिएलाचे भाषण ऐकताना संपूर्ण जगाचे लक्ष अल्बानियाकडे गेले आहे.
आपल्या पहिल्या भाषणात डिएलाने स्पष्ट केले की, विरोधक तिच्या नियुक्तीला सतत असंवैधानिक ठरवत आहेत, परंतु ती फक्त मनुष्याच्या मदतीसाठी आहे, मनुष्याची जागा घेण्यासाठी नाही. “ संविधानाला धोका मशीनमुळे नसून सत्तेत बसलेल्या लोकांच्या अमानवीय निर्णयांमुळे आहे,” असे डिएलाने म्हटले.
डिएलाने आश्वासन दिले की पारदर्शकता, जबाबदारी आणि निष्पक्षता या मूल्यांचे पालन ती तितक्याच काटेकोरपणे करेल जितके मनुष्य करतात. आपल्या संसदीय कामाच्या पहिल्या दिवशी डिएला पारंपरिक अल्बानियन पोशाखात दिसली, आणि तिचा चेहरा व आवाज सुप्रसिद्ध अभिनेत्री अनिला बिशा वर आधारित आहे. ‘डिएला’ नावाचा अर्थ अल्बानियन भाषेत “सूर्य” असा होतो, आणि त्या नावानेच ती ओळखली जाते.
डिएलाची नियुक्ती अल्बानियाचे पंतप्रधान एदी रामा (Edi Rama) यांनी १२ सप्टेंबर रोजी सार्वजनिक खरेदी मंत्रालयात (Public Procurement Ministry) केली. अल्बानिया युरोपियन युनियनमध्ये (EU) सामील होण्याच्या प्रक्रियेत आहे, परंतु देशात सुरू असलेला भ्रष्टाचार मोठा आव्हान ठरत आहे. सरकारी टेंडर प्रक्रियेत पारदर्शकता आणण्यासाठी आणि भ्रष्टाचाराला पूर्णविराम देण्यासाठी हा प्रयोग करण्यात आला आहे. पंतप्रधानांनी सांगितले की, सार्वजनिक निधीच्या वापरात १०० टक्के पारदर्शकता आणि भ्रष्टाचारमुक्त प्रक्रिया राबविण्याची जबाबदारी डिएलाकडे असेल.
जगातील पहिल्यांदाच एआय मंत्री नेमण्याचा अल्बानियाचा निर्णय भविष्यातील राजकारण आणि प्रशासनासाठी आदर्श ठरू शकतो. यामुळे अल्बानिया डिजिटल गव्हर्नन्स आणि कृत्रिम बुद्धिमत्ता क्षेत्रात नवा अध्याय लिहित आहे.
