प्रसारमाध्यम l दिग्विजय माळकर
सिंगापूर: इराणबरोबर अणुकराराबाबत तोडगा न निघाल्यास अमेरिका पुन्हा लष्करी कारवाई करण्यास सज्ज असल्याचे अमेरिकेचे संरक्षणमंत्री पीट हेगसेथ यांनी शनिवारी स्पष्ट केले. सिंगापूर येथे सुरू असलेल्या ‘शांग्री-ला डायलॉग’ या आशियातील प्रमुख संरक्षण परिषदेत ते बोलत होते.
हेगसेथ म्हणाले की, आवश्यक असल्यास अमेरिका पुन्हा हल्ले करण्यास पूर्णपणे सक्षम आहे. यासाठी आवश्यक असलेला दारुगोळा आणि लष्करी साठा अमेरिकेकडे मुबलक प्रमाणात उपलब्ध आहे. तसेच, अमेरिका संरक्षण उत्पादन क्षमता दोन ते चार पटींनी वाढवत असल्याचेही त्यांनी सांगितले.
अमेरिकेचे अध्यक्ष डोनाल्ड ट्रम्प इराणबरोबर असा करार करण्यास इच्छुक आहेत, ज्यामुळे इराणला अण्वस्त्रनिर्मितीपासून रोखता येईल, असे हेगसेथ यांनी नमूद केले. दरम्यान, ट्रम्प यांनी इराण संघर्ष संपविण्याच्या प्रस्तावावर अंतिम निर्णय घेण्यासाठी व्हाइट हाऊसमध्ये बैठक घेणार असल्याचे शुक्रवारी सांगितले होते.
फेब्रुवारीअखेरीस सुरू झालेल्या अमेरिका-इस्रायल आणि इराणमधील संघर्षामुळे हजारो लोकांचा बळी गेला असून जागतिक अर्थव्यवस्थेवरही त्याचा परिणाम झाला आहे. इराणने होर्मुझ सामुद्रधुनीवरील प्रभावी नियंत्रणामुळे ऊर्जा दरांमध्ये वाढ झाली आहे.
चीनविरोधात आशियाई देशांनी सज्ज व्हावे
याच परिषदेत बोलताना हेगसेथ यांनी चीनच्या वाढत्या लष्करी ताकदीबाबत चिंता व्यक्त केली. आशियातील मित्रराष्ट्रांनी संरक्षण खर्च वाढवून अधिक स्वावलंबी व्हावे, असे आवाहन त्यांनी केले.
“चीनच्या अभूतपूर्व लष्करी विस्तारामुळे आणि प्रादेशिक हालचालींमुळे चिंता वाढत आहे. कोणत्याही एका देशाचे वर्चस्व आशिया-प्रशांत क्षेत्रातील सत्तासंतुलन बिघडवू शकते,” असे ते म्हणाले.
‘फ्रीलोडिंग’चा काळ संपला
अध्यक्ष ट्रम्प यांच्या भूमिकेचा पुनरुच्चार करताना हेगसेथ यांनी मित्रराष्ट्रांनी स्वतःच्या संरक्षणासाठी अधिक आर्थिक जबाबदारी उचलावी, असे सांगितले.
“अमेरिका श्रीमंत देशांच्या संरक्षणाचा खर्च उचलत राहील, असा काळ आता संपला आहे. आम्हाला आश्रित नव्हे तर सक्षम भागीदार हवे आहेत. प्रत्येकाने आपला वाटा उचलला पाहिजे,” असे त्यांनी स्पष्ट केले.
दक्षिण कोरिया, फिलिपाइन्स, ऑस्ट्रेलिया, सिंगापूर, मलेशिया, थायलंड आणि जपान या देशांच्या संरक्षण क्षेत्रातील योगदानाचे त्यांनी कौतुक केले.
