मुंबई : प्रसारमाध्यम वृत्तसेवा
महाराष्ट्र लोकसेवा आयोगातर्फे ( एमपीएससी ) घेण्यात आलेल्या महाराष्ट्र गट-क सेवा संयुक्त पूर्वपरीक्षा-२०२४ चा निकाल जाहीर करण्यात आला आहे. १ जून रोजी ही परीक्षा पार पडली होती. निकालाद्वारे एकूण २६ हजार ७४० उमेदवार मुख्य परीक्षेस पात्र ठरले असून त्यांची बैठक क्रमांकासह नावाची यादी व गुणांची सीमारेषा आयोगाच्या संकेत स्थळावर प्रसिद्ध करण्यात आली आहे.
आयोगाने जाहीर केलेल्या माहितीनुसार, मुख्य परीक्षा २१ सप्टेंबर रोजी होणार आहे. मात्र, राज्यातील पूरस्थितीचा विचार करून आयोगाने उमेदवारांना दिलासा दिला आहे. आता मुख्य परीक्षेसाठी अर्ज करण्याची मुदत २५ ऑगस्टपर्यंत वाढविण्यात आली आहे.
एमपीएससीच्या प्रसिद्धिपत्रकात स्पष्ट करण्यात आले आहे की, पूर्वपरीक्षेसाठी सादर केलेल्या अर्जातील दावेच मुख्य परीक्षेसाठी ग्राह्य धरले जातील. तसेच, आवश्यक तपासणीनुसार जर कोणता उमेदवार अपात्र ठरला, तर त्याची उमेदवारी आयोगाकडून कोणत्याही टप्प्यावर रद्द केली जाईल.
निकाल विविध न्यायालये व न्यायाधिकरणांत दाखल असलेल्या न्यायिक प्रकरणांच्या अंतिम निर्णयाच्या अधीन राहून जाहीर करण्यात आला आहे. पात्र ठरलेल्या उमेदवारांना त्यांनी अर्जात नमूद केलेल्या मोबाईल क्रमांकावर लघुसंदेशाद्वारे कळविण्यात येईल.
मुख्य परीक्षेसाठी प्रवेश मिळविण्यासाठी उमेदवारांनी ऑनलाइन पद्धतीने आवश्यक माहिती व परीक्षा शुल्क विहित मुदतीत आणि विहित पद्धतीने सादर करणे बंधनकारक असल्याचे आयोगाने स्पष्ट केले आहे. अन्यथा उमेदवाराला मुख्य परीक्षेस प्रवेश दिला जाणार नाही.
———————————————————————————————-
