मुंबई : प्रसारमाध्यम वृत्तसेवा
पंढरपूर तीर्थक्षेत्र विकास आराखड्यांतर्गत शहरातील २१३ सफाई कामगार कुटुंबांसाठी उभारल्या जाणाऱ्या गृहप्रकल्पाला लवकरच मूर्त स्वरूप दिलं जाणार आहे. प्रत्येकी ६०० चौ.फुट क्षेत्रफळाच्या सदनिकांसाठी एकूण ५५ कोटी ६१ लाख रुपयांचा खर्च प्रस्तावित असून, या घरांचा प्रश्न तातडीने निकाली काढण्याचे आश्वासन उपमुख्यमंत्री अजित पवार यांनी आज विधानसभेत दिले.
विधानसभा सदस्य हेमंत रासने यांनी या प्रलंबित विषयावर लक्षवेधी सूचना मांडली होती. त्यावर उत्तर देताना अजित पवार म्हणाले, “पंढरपूरच्या सफाई कामगारांच्या प्रश्नाकडे गांभीर्याने लक्ष देण्यात आले आहे. याच पार्श्वभूमीवर आजच सोलापूर जिल्हाधिकारी आणि स्थानिक लोकप्रतिनिधींसोबत चर्चा करून त्यांना योग्य ते निर्देश दिले जातील.”
या गृहप्रकल्पात एकूण १३ इमारती उभारण्यात येणार असून, त्यापैकी १२ इमारती ४ मजली तर एक इमारत ५ मजली असणार आहे. त्यात २१३ रहिवासी युनिट्ससह रस्त्यालगतच्या ७ इमारतींमध्ये २४ दुकानेही प्रस्तावित आहेत.
“या घरांसाठी निधी कमी पडू दिला जाणार नाही. कामगारांचे दीर्घकाळ प्रलंबित घरप्रश्न सोडवण्याची आमची भूमिका स्पष्ट आहे. या प्रकल्पाला लवकरात लवकर प्रत्यक्ष अंमलबजावणी मिळेल, यासाठी प्रशासनाला निर्देश दिले जातील,” असंही पवार यांनी स्पष्ट केलं.
पंढरपूर शहरातील सफाई कामगारांच्या जीवनात स्थैर्य निर्माण करण्याच्या दृष्टीने हा गृहप्रकल्प महत्त्वपूर्ण मानला जात असून, सरकारच्या निर्णयामुळे त्यांच्या निवासाच्या आणि उपजीविकेच्या दृष्टीनेही दिलासा मिळणार आहे.
———————————————————————————————–
