राज्यात ‘नो पीयूसी… नो फ्युएल’ उपक्रम

मुंबई : प्रसारमाध्यम वृत्तसेवा

भविष्यातील पिढ्यांसाठी स्वच्छ व प्रदूषणमुक्त वातावरण निर्माण करण्याच्या उद्देशाने महाराष्ट्र परिवहन विभागाने महत्त्वपूर्ण निर्णय जाहीर केला आहे. परिवहन मंत्री प्रताप सरनाईक यांनी राज्यातील सर्व पेट्रोल पंपांवर ‘नो पीयूसी… नो फ्युएल’ ( No PUC… No Fuel ) हा उपक्रम कठोरपणे लागू करण्याचे निर्देश दिले आहेत.

अंमलबजावणी कशी होणार ?

परिवहन विभागाने या उपक्रमाची प्रभावी अंमलबजावणीसाठी खालील पद्धती ठरविल्या आहेत

• सीसीटीव्ही स्कॅनिंग : प्रत्येक पेट्रोल पंपावर सीसीटीव्ही कॅमेऱ्यांच्या मदतीने इंधन भरण्यासाठी येणाऱ्या वाहनांचा क्रमांक स्कॅन केला जाईल.

• पीयूसी तपासणी : स्कॅन केलेल्या क्रमांकावरून त्या वाहनाचे पीयूसी प्रमाणपत्र वैध आहे की नाही, हे तपासले जाईल.

• इंधन नाही : पीयूसी प्रमाणपत्र वैध नसेल, तर त्या वाहनाला इंधन दिले जाणार नाही.

• जागेवरच पीयूसीची सोय : वाहनचालकांची गैरसोय टाळण्यासाठी, त्याच पेट्रोल पंपावर तात्काळ पीयूसी प्रमाणपत्र काढून देण्याची व्यवस्था केली जाईल.

• युनिक आयडी : प्रत्येक पीयूसी प्रमाणपत्राला एक युनिक आयडेंटिटी (UID) दिली जाईल, ज्यामुळे त्याची वैधता वेळोवेळी तपासता येईल.

अवैध प्रमाणपत्रांवर कारवाई

बैठकीत सरनाईक यांनी अवैध मार्गाने पीयूसी प्रमाणपत्र देणाऱ्या टोळ्यांवर कठोर कारवाई करण्याचे आदेश दिले आहेत. भविष्यात वाहन विक्री करणाऱ्या शोरूम्स आणि गॅरेजेसमध्येही पीयूसी प्रमाणपत्र देण्याची व्यवस्था करण्यात येणार आहे. यामुळे रस्त्यावरील प्रत्येक वाहनाकडे वैध प्रमाणपत्र असेल आणि प्रदूषण कमी होण्यास मदत होईल.

हा उपक्रम प्रदूषण कमी करण्याच्या दृष्टिकोनातून अत्यंत प्रभावी ठरणार असून, वाहनधारकांना त्यांच्या वाहनाची नियमित देखभाल करण्यास प्रोत्साहन मिळणार आहे.

———————————————————————————————–