भारत-युरोपियन FTA लागू

नवी दिल्ली : प्रसारमाध्यम वृत्तसेवा

भारताच्या व्यापार क्षेत्रात ऐतिहासिक टप्पा गाठला गेला आहे. १ ऑक्टोबर पासून भारत आणि युरोपियन फ्री ट्रेड असोसिएशन (EFTA) मधील चार देश – आयसलंड, लिचेस्टाईन, नॉर्वे आणि स्वित्झर्लंड यांच्यात मुक्त व्यापार करार (FTA) अंमलात येणार आहे. युरोपातील कोणत्याही गटाशी भारताने असा करार प्रथमच केला आहे.

करारातील प्रमुख मुद्दे 

• या चार देशांतून येणाऱ्या ८०-८५% वस्तूंवर भारतात शून्य टक्के आयात शुल्क असेल.

• भारतातून या देशांमध्ये जाणाऱ्या ९९% वस्तूंवर शून्य शुल्क आकारले जाईल.

• पहिल्या १० वर्षांत अंदाजे ५० अब्ज डॉलर गुंतवणूक अपेक्षित आहे, त्यानंतरच्या पाच वर्षांत आणखी ५० अब्ज डॉलरची गुंतवणूक होईल.

• या करारामुळे अंदाजे १० लाख रोजगार थेट उपलब्ध होतील.

कराराचे फायदे

कृषी क्षेत्राला संरक्षण : स्थानिक शेतकरी व दुग्धव्यवसायिकांच्या हिताचे रक्षण करण्यासाठी भारताने कृषी आणि डेअरी उद्योगाला या करारातून वगळले आहे. त्यामुळे देशांतर्गत बाजारपेठेवर परिणाम होणार नाही, असे केंद्र सरकारने स्पष्ट केले आहे.

चीनकडून दिलासा : याच पार्श्वभूमीवर चीनने भारतातील औषध उत्पादनांवरील ३०% आयात शुल्क हटवून ते शून्य टक्क्यांवर आणले आहे. अमेरिकेचे माजी अध्यक्ष डोनाल्ड ट्रम्प यांनी भारतीय औषधांवर १००% अतिरिक्त कर जाहीर केल्यानंतर चीनचे हे पाऊल भारतासाठी दिलासा देणारे ठरले आहे.

व्यापाराचा सध्याचा आकडा : आर्थिक वर्ष २०२४-२५ मध्ये भारताने या चार देशांना १.९७ अब्ज डॉलरची निर्यात केली, त्यापैकी ३३% निर्यात स्वित्झर्लंडला झाली. याउलट, या चारही देशांतून भारताने २२.४४ अब्ज डॉलरची आयात केली, ज्यातील बहुतांश म्हणजे २१.८ अब्ज डॉलर स्वित्झर्लंडहून आली आहे.

नव्या संधींचा मार्ग : या करारामुळे फक्त गुंतवणूक व रोजगारच नव्हे, तर उद्योग, उत्पादनक्षमता आणि निर्यात क्षमताही उंचावेल, असा तज्ज्ञांचा विश्वास आहे. विशेषतः औद्योगिक, औषधनिर्मिती, तंत्रज्ञान आणि उत्पादन क्षेत्रात भारताला मोठा फायदा होणार आहे.

———————————————————————————————————————–