अंबाबाई मंदिरात AI तंत्रज्ञानाचा वापर सुरू

कोल्हापूर : प्रसारमाध्यम न्यूज

राज्यातली महत्त्वाची धार्मिक स्थळं कायमच भाविकांनी गजबजलेली असतात. विशेषतः सण-उत्सवांच्या काळात लाखो भाविक मंदिरांमध्ये दर्शनासाठी येतात. या गर्दीचं नियोजन करणं हे मोठं आव्हान असतं, शिवाय काही वेळा दागिने, पैसे, मोबाईल चोरीला जाण्याच्या घटनाही घडतात. त्यामुळे भाविकांची सुरक्षितता आणि सुविधा दोन्ही लक्षात घेऊन आता अनेक देवस्थानांनी आधुनिक AI तंत्रज्ञानाचा वापर करण्याचा निर्णय घेतला आहे.

येत्या २२ सप्टेंबर पासून सुरू होणाऱ्या शारदीय नवरात्रोत्सवानिमित्त कोल्हापूरच्या करवीर निवासिनी अंबाबाई मंदिरात ‘AI आधारित पीपल काउंटिंग आणि फेस डिटेक्शन’  ही प्रणाली कार्यान्वित केली जाणार आहे. यामुळे गर्दीचं नियोजन सोपं होईलच, पण चोरट्यांसह रेकॉर्डवर असलेल्या गुन्हेगारांनाही मंदिर परिसरात प्रवेश करताच तत्काळ पकडणं शक्य होणार आहे.

ही प्रणाली मंदिराच्या प्रवेशद्वारांवर बसवली जाणार असून, संशयास्पद व्यक्तींची हालचाल ओळखून अलर्ट संस्थानला मिळेल. त्यामुळे अशा व्यक्तींना तिथेच थांबवून आवश्यक कारवाई करणं शक्य होणार आहे. भाविकांचे दागिने, पैसे किंवा मोबाईल चोरीस जाण्याच्या घटना रोखण्यासही ही प्रणाली मदत करेल.

अंबाबाई मंदिर प्रशासनाने याबाबत सांगितले की, “भाविकांची संख्या आणि त्यांची सुरक्षितता ही आमची सर्वोच्च प्राथमिकता आहे. AI तंत्रज्ञानाच्या मदतीने गर्दीचे नियोजन अधिक प्रभावीपणे करता येईल, तसेच मंदिर परिसरात गैरप्रवृत्ती करणाऱ्यांवर लक्ष ठेवणं शक्य होईल.”

राज्यातल्या देवस्थान समितीनेही या उपक्रमाचे स्वागत केले असून, भाविकांनी समाधान व्यक्त केले आहे. मंदिर परिसरातील सुव्यवस्था, गर्दीचे नियंत्रण आणि चोरट्यांना आळा घालण्यासाठी ही प्रणाली उपयुक्त ठरणार असल्याचा विश्वास व्यक्त होत आहे.

अशा प्रकारे आधुनिक तंत्रज्ञानाचा वापर करून श्रद्धेच्या स्थळी सुरक्षेला बळकटी देण्याचा हा प्रयत्न भाविकांसाठी दिलासा ठरणार आहे. श्रद्धा आणि सुरक्षेचा समतोल राखत पुढे जाणाऱ्या या उपक्रमामुळे राज्यातील इतर मंदिरांनाही आदर्श मिळणार आहे.

—————————————————————————————————