सौरभ बोथरा यांचा जीवनप्रवास साधेपणातून तेजस्वी बनलेला आहे. नागपूर सारख्या शहरातून येत त्यांनी आयआयटी बीएचयूमधून अभियांत्रिकी शिक्षण घेतले आणि त्याच वेळी वाचन संस्कृती व सवयींवर भर देणाऱ्या उपक्रमांमध्ये भाग घेतला. शिक्षणानंतर त्यांनी थेट व्यवसाय किंवा नोकरीचा मार्ग न निवडता योगसाधनेत स्वतःला वाहून घेतले. त्यांनी घरातून सुरू केलेले ऑनलाईन योगशिक्षण लॉकडाऊनमध्ये हळूहळू हजारो लोकांपर्यंत पोहोचले आणि त्यातूनच निर्माण झाली ‘HaBuild’ ही सवयी घडवणारी डिजिटल संस्था.
सौरभ यांनी लोकांमध्ये सवयी घडवण्यासाठी ‘नो झिरो डे’सारखी संकल्पना रुजवली आणि व्हॉट्सॲप, यूट्यूब यासारख्या सहज उपलब्ध तंत्रज्ञानाचा उपयोग करून लाखो लोकांचा सहभाग मिळवला. त्यांचे कार्यक्रम फक्त शरीराला नाही, तर मनालाही बळकट करत गेले. त्यातून योगासह जर्नलिंग, डिटॉक्स, ध्यान अशा विविध सवयी निर्माण झाल्या. विशेष म्हणजे त्यांच्या नेतृत्वाखाली एकाच वेळी तब्बल दोन लाखांहून अधिक लोकांनी ऑनलाईन योग करून गिनीज वर्ल्ड रेकॉर्ड प्रस्थापित केला.
सौरभच्या कार्यपद्धतीत व्यायामापेक्षा शिस्त, सोपी भाषा आणि सातत्य यावर भर आहे. रामदेव बाबांनंतर एवढ्या मोठ्या प्रमाणावर योगप्रसार करणारा तरुण सौरभ हा आधुनिक भारतात एक वेगळा प्रेरणास्रोत ठरतो. यूट्यूबवर लाखो लोक त्यांचे व्हिडिओ पाहतात, त्यातून प्रेरणा घेतात आणि आपल्या दैनंदिन जीवनात सकारात्मक बदल करतात. त्यांनी टिकवलेल्या या साध्या पण प्रभावी प्रक्रियेमुळे आज हजारो लोक योगशिवाय दिवसाची सुरुवातच करत नाहीत.
सौरभने सिद्ध केले की, आधुनिक शिक्षण, डिजिटल प्लॅटफॉर्म आणि भारतीय परंपरा यांचा संगम घडवला तर तो केवळ यशस्वीच नाही, तर परिवर्तनकारी ठरतो. त्यांच्या कार्यामुळे लोकांनी आरोग्य, मन आणि दिनचर्येकडे गांभीर्याने पाहायला सुरुवात केली. त्यांनी भारतातच नव्हे तर जगभरात एक सकारात्मक क्रांती निर्माण केली आहे.
या असामान्य प्रवासासाठी आणि लाखो लोकांमध्ये नवचैतन्य जागवण्यासाठी सौरभ बोथरा यांना मनापासून सलाम !
———————————————————————————————-
