Congress leaders met Uddhav Thackeray at Matoshree today and had a detailed discussion about the post of Leader of Opposition in the Legislative Council.
मुंबई : प्रसारमाध्यम वृत्तसेवा
विधान परिषदेतील विरोधी पक्षनेते पदावरून महाविकास आघाडीत राजकीय हालचालींना वेग आला आहे. अंबादास दानवे यांचा विरोधी पक्षनेतेपदाचा कार्यकाळ २९ ऑगस्टला पूर्ण झाल्यानंतर ही जागा कोणाकडे द्यायची यावरून काँग्रेसने ठाम भूमिका घेतली असून, उद्धव ठाकरे यांच्या शिवसेनेशी यासंदर्भात सखोल चर्चा सुरू असल्याची माहिती समोर आली आहे.
काँग्रेसचा दावा आणि सतेज पाटलांचे नाव
मिळालेल्या माहितीनुसार, विधान परिषदेत सध्या काँग्रेसचे आठ आमदार असून ठाकरे गटाच्या शिवसेनेचे सहा आणि राष्ट्रवादी काँग्रेस ( शरद पवार गट ) चे दोन आमदार आहेत. या संख्याबळावरून काँग्रेसने विरोधी पक्षनेते पदावर दावा केला असून, सतेज पाटील यांच्या नावावर जोरदार चर्चा सुरू आहे. सतेज पाटील हे महाराष्ट्रातील प्रभावशाली नेते असून त्यांच्या नेतृत्वाखाली काँग्रेसने या पदावर आपला हक्क सांगण्याची तयारी केली आहे.
काँग्रेस आमदारांमध्ये सतेज पाटील, प्रज्ञा सातव, भाई जगताप, अभिजीत वंजारी, धीरज लिंगाडे, राजेश राठोड, जयंत आसगावकर ( पुणे शिक्षक मतदारसंघ ) आणि सुधाकर आडबाले ( नागपूर शिक्षक मतदारसंघ ) यांचा समावेश आहे. ठाकरे गटाच्या आमदारांमध्ये उद्धव ठाकरे, मिलिंद नार्वेकर, ज. मो. अभ्यंकर, अनिल परब, सुनील शिंदे आणि सचिन अहिर यांचा समावेश आहे.
मातोश्रीवर बैठक
काँग्रेसच्या नेत्यांनी थेट मातोश्रीवर उद्धव ठाकरे यांची भेट घेऊन विधान परिषदेच्या विरोधी पक्षनेते पदाबाबत सविस्तर चर्चा केली. त्यासोबतच स्थानिक स्वराज्य संस्थांच्या आगामी निवडणुका कशा लढवायच्या, महाविकास आघाडीतील समन्वय कसा राखायचा, तसेच राज्यात सध्या निर्माण झालेल्या आरक्षणाच्या पार्श्वभूमीवर समाजातील अस्वस्थता कशी कमी करावी यावरही विचारविनिमय करण्यात आला.
काँग्रेस नेते विजय वडेट्टीवार यांनी या बैठकीबाबत सांगितले की, “ सतेज पाटील यांच्या नावाची नक्कीच चर्चा झाली आहे ; मात्र अंतिम निर्णय दिल्लीतील हायकमांडच्या चर्चेनंतर घेतला जाईल. आम्ही महाविकास आघाडीत समन्वय राखून पुढील राजकीय दिशा ठरवू.”
राजकीय अस्थिरता
राज्यात मराठा आरक्षणासाठी सुरू असलेल्या आंदोलनामुळे समाजात मोठ्या प्रमाणावर अस्वस्थता निर्माण झाली आहे. त्यातच ‘हैद्राबाद गॅझेटीयर’वरील वादामुळे राज्य सरकारवरही दबाव वाढला आहे. मराठा, ओबीसी आणि बंजारा समाज स्वतंत्र बैठकीत आपापली भूमिका ठरवत असून त्यामुळे सामाजिक आणि राजकीय समीकरणे सतत बदलत आहेत. या परिस्थितीत विरोधी पक्षाची भूमिका बळकट करण्यासाठी काँग्रेस आणि शिवसेना यांच्यातील समन्वय अत्यंत महत्त्वाचा ठरणार आहे.
दिल्लीतील हायकमांडशी चर्चा झाल्यानंतर विरोधी पक्षनेते पदासाठी अधिकृत घोषणा केली जाण्याची शक्यता आहे. मात्र महाविकास आघाडीमध्ये अंतर्गत समन्वय राखून विरोधक म्हणून मजबूत भूमिका घेण्याची तयारी सुरू असल्याचे स्पष्ट झाले आहे. सतेज पाटील यांचे नाव पुढे आले असले तरी अंतिम निर्णय अजून झालेला नाही.
