कोल्हापूर : प्रसारमाध्यम न्यूज
विधानसभा निवडणुकीच्या पार्श्वभूमीवर राज्यातील राजकीय हालचालींना वेग आला असून, राष्ट्रवादी काँग्रेस (शरद पवार गट) मध्ये गेलेले समरजीत घाटगे आता पुन्हा भाजपमध्ये घरवापसी करणार असल्याची माहिती समोर येत आहे.
विश्वसनीय सूत्रांकडून मिळालेल्या माहितीनुसार, घाटगे यांच्या भाजप प्रवेशाची तयारी पूर्ण झाली असून, भाजपचे ज्येष्ठ नेते व उच्च आणि तंत्रशिक्षण मंत्री चंद्रकांत पाटील यांच्याच उपस्थितीत त्यांचा पक्षप्रवेश होण्याची शक्यता आहे. पाटील हे लवकरच कोल्हापूर दौऱ्यावर येणार असून, त्याच दौऱ्यात घाटगे यांच्या प्रवेशाची अधिकृत घोषणा होण्याची शक्यता आहे.
महाविकास आघाडीकडून समरजीत घाटगे यांनी मागील विधानसभा निवडणुकीत कागल मतदारसंघातून उमेदवारी केली होती. मात्र, पुढील निवडणुकीसाठी त्यांनी भाजपकडे वाटचाल सुरू केली असून, ऑगस्ट महिन्यात त्यांच्या प्रवेशाच्या हालचालींना अधिक वेग येईल, असे सांगण्यात येत आहे.
राजकीयदृष्ट्या कागल हा अत्यंत महत्त्वाचा मतदारसंघ मानला जातो. समरजीत घाटगे यांच्या पुनर्प्रवेशामुळे भाजपला या भागात अधिक बळ मिळू शकते, असा अंदाज राजकीय वर्तुळात व्यक्त केला जात आहे.
भाजपच्या कोल्हापूर दौऱ्यानंतर पुढील राजकीय समीकरणे अधिक स्पष्ट होतील. घाटगे यांच्या प्रवेशाबाबतची अधिकृत घोषणा लवकरच होण्याची शक्यता असून, यामुळे आगामी विधानसभा निवडणुकीत कोल्हापूर जिल्ह्यातील राजकारणात मोठा बदल घडू शकतो.
——————————————————————————–
