शाही दसरा महोत्सवाचा आज भव्य शुभारंभ

कोल्हापूर : प्रसारमाध्यम न्यूज

कोल्हापूरच्या वैभवशाली परंपरेचा ठसा उमटवणाऱ्या शाही दसरा महोत्सवाचा भव्य शुभारंभ आज, सोमवार दि. २२ सप्टेंबर २०२५ रोजी सायंकाळी ६ वाजता ऐतिहासिक दसरा चौक मैदान येथे होणार आहे. जिल्हा प्रशासन व सांस्कृतिक कार्य संचालनालय, महाराष्ट्र शासन यांच्या संयुक्त विद्यमाने या महोत्सवाचे आयोजन करण्यात आले आहे.

महोत्सवाचा शुभारंभ सार्वजनिक आरोग्य व कुटुंब कल्याण मंत्री तथा कोल्हापूर जिल्ह्याचे पालकमंत्री प्रकाश आबिटकर यांच्या हस्ते, तर लोकसभा सदस्य श्रीमंत शाहू महाराज छत्रपती यांच्या अध्यक्षतेखाली होणार आहे असल्याची माहिती जिल्हाधिकारी अमोल येडगे यांनी दिली.

महोत्सवी कार्यक्रमाची सुरुवात दुपारपासूनच होत असून, दि. २२ रोजी सायं. ५.३० वाजता राजर्षी शाहू स्मारक भवन सभागृह, दसरा चौक येथे शिवकालीन शस्त्र प्रदर्शनाचे उद्घाटन होणार आहे. त्यानंतर सायं. ६ वाजता दसरा महोत्सव उद्घाटन सोहळ्यानंतर मराठ्यांच्या पराक्रमाची गाथा उलगडणारे ऐतिहासिक महानाट्य ‘गाथा शिवशंभूची’ दसरा चौक मैदानावर रंगणार आहे.

या शाही परंपरेचा साक्षीदार होण्यासाठी जिल्ह्यातील नागरिकांसह राज्यभरातून येणाऱ्या सर्व भाविक व पर्यटकांनी मोठ्या संख्येने उपस्थित राहावे, असे आवाहन जिल्हा प्रशासनामार्फत करण्यात आले आहे.

या वेळी वैद्यकीय शिक्षण मंत्री हसन मुश्रीफ, नगरविकास, परिवहन, सामाजिक न्याय, वैद्यकीय शिक्षण, अल्पसंख्यांक विकास व औकाफ राज्यमंत्री तथा सहपालकमंत्री माधुरी मिसाळ, राज्य नियोजन मंडळाचे कार्यकारी अध्यक्ष राजेश क्षीरसागर प्रमुख पाहुणे म्हणून उपस्थित राहणार आहेत. तसेच खासदार धनंजय महाडिक, धैर्यशील माने, आमदार सतेज पाटील, अरुण लाड, विनय कोरे, राजेंद्र पाटील-यड्रावकर, चंद्रदीप नरके, अमल महाडिक, अशोकराव माने, शिवाजीराव पाटील, राहुल आवाडे यांचीही विशेष उपस्थिती लाभणार आहे.

———————————————————————————————————————–