कोल्हापूर : प्रसारमाध्यम न्यूज
नवरात्रीचे दिवस जवळ आले की, घराघरात आनंद, उत्साह आणि जल्लोष ओसंडून वाहतो. या सणात घर सजवण्यापासून ते नवीन कपडे, इलेक्ट्रॉनिक्स, दागिने, भेटवस्तू अशा सर्वच वस्तू खरेदीसाठी हात आखडता घेणे कठीण जाते. यंदा तर ऑनलाईन प्लॅटफाॅर्मवर मोठ्या जल्लोषात सेलची घोषणा केली गेली आहे. प्रत्येक श्रेणीत आकर्षक ऑफर्स, बंपर सवलती, कॅशबॅक आणि बँक ऑफर्सची आतषबाजी होत आहे.
पण इथेच खरी कसोटी असते ती ग्राहकांच्या संयमाची आणि नियोजनाची. ऑफर्सच्या आणि “आता नाही तर कधीच नाही ” अशा जाहिरातींच्या धडाक्यात आपण अनेकदा गरजेपेक्षा जास्त खर्च करतो, नको असलेल्या वस्तू खरेदी करतो. अखेरीस सेल संपल्यानंतर बजेट ओलांडल्याची खंत उरते. म्हणूनच या खरेदीत शहाणपणाचे शस्त्र सोबत ठेवणे फार महत्त्वाचे ठरते.
खरेदीसाठी शहाणपणाचे मंत्र
-
यादी बनवा – मनात काय घ्यायचे आहे हे आधी ठरवा. यादी शिवाय केलेली खरेदी नेहमी फाजील ठरते.
-
बजेट आखा – किती खर्च परवडणार आहे, याचा अंदाज बांधून त्यावर खंबीरपणे टिकून राहा.
-
किंमतींची तुलना करा – एकाच वस्तूची किंमत वेगवेगळ्या प्लॅटफॉर्मवर भिन्न असते. योग्य ठिकाणी डील निवडा.
-
किंमत इतिहास तपासा – खोटी सवलत दाखवण्याचा प्रकार टाळण्यासाठी किंमतींचे निरीक्षण करा.
-
बँक व वॉलेट ऑफर्स वापरा – अतिरिक्त सवलत मिळवण्याचा हा सोपा मार्ग आहे.
-
एक्सचेंज ऑफरचा विचार करा – जुने उत्पादन बदलून नवे घेतल्यास मोठा फायदा होतो.
-
रिवॉर्ड पॉइंट्स व कॅशबॅक वापरा – आधीच जमा झालेले पॉइंट्स खरेदी हलकी करतात.
-
नो-कॉस्ट ईएमआय सावधपणे घ्या – मासिक हप्ता परवडेल का याचा विचार करा.
-
रिव्ह्यू व रेटिंग वाचा – केवळ स्वस्त म्हणून खरेदी करणे धोक्याचे ठरू शकते.
-
मर्यादित काळातील डीलकडे लक्ष ठेवा – योग्य वस्तू दिसली की विलंब न करता खरेदी करा.
