कोल्हापूर महापालिका निवडणूक; काँग्रेसची पहिली यादी जाहीर;२९ नवे चेहरे रिंगणात

प्रसारमाध्यम l दिग्विजय माळकर 

कोल्हापूर महापालिका निवडणूक : महिलांना मोठे प्रतिनिधित्व, काही प्रभागांत चुरशीची लढत

कोल्हापूर महानगरपालिका सार्वत्रिक निवडणुकीसाठी राष्ट्रीय काँग्रेस पक्षाने ४८ उमेदवारांची पहिली यादी शुक्रवारी रात्री जाहीर केली. या यादीतून २९ नव्या चेहऱ्यांना संधी देण्यात आली असून, पक्षाने अनुभव आणि नव्या नेतृत्वाचा समतोल साधण्याचा प्रयत्न के आहेला.

महाराष्ट्र प्रदेश काँग्रेस समितीच्या राज्य निवड मंडळाची बैठक प्रदेशाध्यक्ष हर्षवर्धन सपकाळ यांच्या अध्यक्षतेखाली पार पडली. या बैठकीस खासदार शाहू छत्रपती, विधानपरिषदेचे गटनेते आमदार सतेज पाटील यांच्यासह पक्षाचे वरिष्ठ पदाधिकारी उपस्थित होते.

अनुभावींना संधी ….

जाहीर यादीत विधानसभा निवडणूक लढलेले राजेश भरत लाटकर, माजी उपमहापौर भूपाल महिपती शेटे, संजय मोहिते, मधुकर रामाणे, दीपा मगदूम, जयश्री चव्हाण यांच्यासह १६ माजी नगरसेवकांचा समावेश आहे.
महायुतीतील जागावाटपाबाबत चर्चा सुरू असतानाच काँग्रेसने निश्चित उमेदवार जाहीर करून तयारीला वेग दिला आहे.

तीन कुटुंबांत दोन उमेदवार

या यादीत तीन कुटुंबांतील दोन-दोन सदस्यांना उमेदवारी देण्यात आली आहे.
माजी नगरसेवक इंद्रजीत बोंद्रे प्रभाग क्रमांक ८ मधून, तर त्यांच्या पत्नी मयुरी बोंद्रे प्रभाग क्रमांक २० मधून निवडणूक लढवणार आहेत.
माजी नगरसेवक राहुल शिवाजीराव माने प्रभाग क्रमांक ९ मधून, तर त्यांच्या पत्नी ऋग्वेदा माने प्रभाग क्रमांक ८ मधून रिंगणात असतील.
माजी उपमहापौर भूपाल शेटे प्रभाग क्रमांक १८ मधून, तर त्यांची कन्या पूजा शेटे प्रभाग क्रमांक १३ मधून निवडणूक लढवणार आहेत.

प्रभाग ९ मध्ये लक्षवेधी लढत

प्रभाग क्रमांक ९ मधून काँग्रेसचे उमेदवार राहुल माने यांच्याविरोधात शिंदेसेनेचे शारंगधर देशमुख मैदानात उतरण्याची शक्यता आहे. त्यामुळे शहरातील सर्वांत चुरशीची लढत या प्रभागात पाहायला मिळण्याची शक्यता आहे.

उद्धवसेनेच्या जागा वगळून घोषणा

उद्धवसेनेला अपेक्षित असलेल्या १२ जागा वगळूनच काँग्रेसने उमेदवारांची घोषणा केल्याचे पक्षाकडून सांगण्यात आले आहे.

दिंडोर्ले यांना काँग्रेसचे पाठबळ

महाराष्ट्र नवनिर्माण सेनेचे जिल्हा प्रमुख राजू आनंदराव दिंडोर्ले यांना काँग्रेसने पुरस्कृत केले आहे. तसेच ज्येष्ठ नगरसेवक मधुकर रामाणे यांच्यावर पुन्हा एकदा पक्षाने विश्वास व्यक्त केला आहे.

२४ महिला उमेदवारांचा समावेश

या पहिल्या यादीत २४ महिलांना उमेदवारी देण्यात आली आहे. उमा बनछोडे, दीपा मगदूम, जयश्री चव्हाण या माजी नगरसेविकांसह महिलांना मोठे प्रतिनिधित्व देण्यात आले आहे.

शिवाजी पेठेतील उमेदवारी प्रलंबित

शिवाजी पेठेतील काँग्रेसचे इच्छुक अक्षय विक्रम जरग आणि उद्धवसेनेचे राहुल इंगवले यांच्यापैकी कोणाला उमेदवारी द्यायची, याबाबत निर्णय अद्याप झालेला नाही. त्यामुळे ही जागा सध्या प्रलंबित ठेवण्यात आली आहे.

अर्ज भरण्यासाठी गर्दीची शक्यता

महायुतीकडून प्रतिस्पर्धी उमेदवार निश्चित झाल्यानंतर काही प्रभागांतील जागा सर्वसाधारण की मागासवर्गीय ठेवायच्या याचा निर्णय घेतला जाणार आहे. सर्व उमेदवारांना मंगळवारी (३०) एबी फॉर्म देण्यात येणार असून, सोमवारी व मंगळवारी अर्ज भरण्यासाठी मोठी गर्दी होण्याची शक्यता आहे.

 उमेदवार यादी (भाग – १)

 उमेदवार यादी (भाग – २)

उमेदवार यादी (भाग – ३)