भारताची कन्या काम्या कार्तिकेयन – गिर्यारोहण विश्वातील तेजस्वी तारा

प्रसारमाध्यम l दिग्विजय माळकर

अत्यंत कमी वयात जागतिक स्तरावर भारताचे नाव उज्ज्वल करणारी काम्या कार्तिकेयन ही एक प्रसिद्ध भारतीय गिर्यारोहक आहे. अवघ्या सातव्या वर्षापासून गिर्यारोहणास सुरुवात करणाऱ्या काम्याने आपल्या जिद्द, मेहनत आणि धाडसाच्या जोरावर अनेक ऐतिहासिक विक्रम प्रस्थापित केले आहेत.

सातही खंडांतील सर्वोच्च शिखरे सर करणारी सर्वात तरुण महिला

डिसेंबर २०२४ मध्ये अंटार्क्टिकातील माउंट विन्सन सर करत काम्याने सेव्हन समिट चॅलेंज पूर्ण केला. यामुळे जगातील सातही खंडांतील सर्वोच्च शिखरे सर करणारी ती जगातील सर्वात तरुण महिला ठरली आहे.

एव्हरेस्टपासून दक्षिण ध्रुवापर्यंतचा थरारक प्रवास

मे २०२४ मध्ये अवघ्या १६ व्या वर्षी काम्याने नेपाळच्या बाजूने माउंट एव्हरेस्ट सर केला. हा पराक्रम करणारी ती सर्वात तरुण भारतीय गिर्यारोहक ठरली.
तसेच डिसेंबर २०२५ मध्ये उणे ३० अंश तापमानात ११५ किमी स्कीइंग करत तिने दक्षिण ध्रुव गाठला आणि हा विक्रम करणारी ती सर्वात कमी वयाची भारतीय बनली.

कुटुंबाचा भक्कम पाठिंबा

काम्याचे वडील एस. कार्तिकेयन हे भारतीय नौदलात कमांडर असून, आई लावण्या कार्तिकेयन या शिक्षिका आहेत. तिच्या बहुतेक गिर्यारोहण मोहिमा वडिलांच्या मार्गदर्शनाखाली पूर्ण झाल्या आहेत. सध्या ती मुंबईतील नेव्ही चिल्ड्रन स्कूलमध्ये शिक्षण घेत आहे.

 काम्या कार्तिकेयनने सर केलेली सातही शिखरे (Seven Summits)

पुरस्कार आणि गौरव

काम्याच्या या असामान्य कामगिरीसाठी तिला २०२१ मध्ये प्रधानमंत्री राष्ट्रीय बाल पुरस्कार देऊन गौरविण्यात आले. तसेच पंतप्रधान नरेंद्र मोदी यांनी ‘मन की बात’ या कार्यक्रमात तिच्या यशाचे विशेष कौतुक केले आहे.

आज काम्या कार्तिकेयन ही केवळ एक यशस्वी गिर्यारोहक नसून, भारतासह जगभरातील तरुणांसाठी प्रेरणास्थान बनली आहे.