कोल्हापूर : प्रसारमाध्यम न्यूज
नांदणी येथील जैन मठातील हत्तीण माधुरीला वनतारा प्रकल्पातून परत आणण्यासाठी शिवसेना (शिंदे गट) चे नेते व राज्याचे उपमुख्यमंत्री एकनाथ शिंदे यांच्या नेतृत्वाखालील शिष्टमंडळाने अमित शहा यांची भेट घेतली. केंद्रीय गृहमंत्री अमित शहा यांनी आज विविध विषयांवर चर्चा करताना कोल्हापूरच्या माधुरी हत्तीच्या संदर्भातील मुद्द्यालाही विशेष महत्त्व दिलं. कोल्हापूरच्या जनतेच्या भावना लक्षात घेऊन, हा मुद्दा गांभीर्याने घेण्यात येणार असल्याचं त्यांनी स्पष्ट केलं.
या शिष्टमंडळात कोल्हापूरचे खासदार धैर्यशील माने हेही उपस्थित होते. माधुरी हत्तीला कोल्हापुरात परत आणण्यासाठी सुरू असलेल्या प्रयत्नांचा भाग म्हणून ही भेट महत्त्वाची ठरली असल्याचे खा. माने यांनी माध्यमाशी बोलताना सांगितले.
शिष्टमंडळाने माधुरी हत्तीचा कोल्हापूरच्या सांस्कृतिक व धार्मिक परंपरेशी असलेला संबंध अधोरेखित करत, तिच्या परतीसाठी केंद्र सरकारने तातडीने पावलं उचलावीत, अशी मागणी केली. यावर सकारात्मक प्रतिसाद देत, गृहमंत्री अमित शहा यांनी या प्रकरणाची तातडीने चौकशी करून आवश्यक त्या उपाययोजना केल्या जातील, असं आश्वासन दिलं.
