कोल्हापूर : प्रसारमाध्यम न्यूज
राज्याचे वैद्यकीय शिक्षण मंत्री तथा कोल्हापूर जिल्ह्याचे ज्येष्ठ नेते हसन मुश्रीफ यांना मोठा दिलासा मिळाला आहे. सरसेनापती संताजी घोरपडे साखर कारखान्यातील कथित ४० कोटी रुपयांच्या आर्थिक अफरातफर प्रकरणात त्यांना पोलिसांकडून क्लीन चीट देण्यात आली असून, न्यायालयानेही त्यांची गुन्हा रद्द करण्यासाठी दाखल केलेली याचिका निकाली काढली आहे.
भाजप नेते किरीट सोमय्या यांनी या प्रकरणात हसन मुश्रीफ यांच्यावर वारंवार गंभीर आरोप करत, कारवाईची मागणी केली होती. या पार्श्वभूमीवर राजकीय वर्तुळात मोठी खळबळ उडाली होती. तथापि, आता पोलिसांनी या प्रकरणात क्लोजर रिपोर्ट दाखल केल्याची अधिकृत माहिती समोर आली आहे.
मुरगूड पोलिसांची तपासणी पूर्ण, क्लोजर रिपोर्ट न्यायालयात
सरसेनापती संताजी घोरपडे साखर कारखान्यातील आर्थिक व्यवहारांमध्ये अनियमितता झाल्याचा आरोप होत होता. या प्रकरणी मुरगूड पोलिस ठाण्यात गुन्हा दाखल करण्यात आला होता. तपासानंतर पोलिसांनी कोणतेही ठोस पुरावे न आढळल्यामुळे संबंधित प्रकरणात क्लोजर रिपोर्ट न्यायालयात सादर केला.
न्यायालयाकडून याचिकेचा निकाल
या प्रकरणाची दखल घेत, मुंबई उच्च न्यायालयाच्या कोल्हापूर खंडपीठाचे न्यायमूर्ती अजय गडकरी आणि न्यायमूर्ती राजेश पाटील यांनी हसन मुश्रीफ यांच्या याचिकेवर सुनावणी घेतली. पोलिसांकडून क्लोजर रिपोर्ट सादर झाल्याची नोंद घेऊन, न्यायालयाने याचिका निकाली काढली असून, मुश्रीफ यांना या प्रकरणात दिलासा मिळाला आहे.
ही क्लीन चीट हसन मुश्रीफ यांच्यासाठी राजकीयदृष्ट्या महत्त्वाची मानली जात आहे. विरोधकांकडून होत असलेल्या टीकेला उत्तर देण्यास आता त्यांना हातात एक मजबूत मुद्दा मिळाला आहे. यापुढे भाजपकडून याच प्रकरणाचा मुद्दा उपस्थित केला जाण्याची शक्यता कमी असल्याचे निरीक्षकांचे म्हणणे आहे.
————————————————————————————————-
