रविंद्र चव्हाण यांची भाजप प्रदेशाध्यक्षपदी निवड

रविंद्र चव्हाण यांचा राजकीय प्रवास

रविंद्र चव्हाण यांचा जन्म २० सप्टेंबर १९७० रोजी झाला. त्यांनी पदवीपर्यंतचे शिक्षण घेतले आहे. २००२ मध्ये भाजप युवा मोर्चाचे कल्याण जिल्हा उपाध्यक्ष म्हणून त्यांनी आपल्या राजकीय कारकिर्दीची सुरुवात केली.

२००५ मध्ये ते कल्याण डोंबिवली महापालिकेचे नगरसेवक म्हणून निवडून आले. त्यानंतर २००७ मध्ये काँग्रेस-राष्ट्रवादी आघाडीची सत्ता असतानाही ते भाजपचे नगरसेवक असूनही स्थायी समितीचे सभापती झाले. यामध्ये त्यांच्या नेतृत्वगुणांची छाप पडली.

२००९ मध्ये तत्कालीन भाजप आमदार हरिश्चंद्र पाटील यांचे तिकीट कापून भाजपने रविंद्र चव्हाण यांना उमेदवारी दिली आणि त्यांनी ती निवडणूक जिंकली. तेव्हापासून त्यांच्या राजकीय कारकिर्दीत सातत्याने प्रगती झाली आहे. २०१४ मध्ये दुसऱ्यांदा विधानसभेवर निवडून येत त्यांनी आपली लोकप्रियता कायम ठेवली.

प्रदेशाध्यक्षपद मिळाल्यानंतर रविंद्र चव्हाण यांच्या खांद्यावर भाजपच्या आगामी संघटनात्मक आणि निवडणूक रणनीतीची मोठी जबाबदारी आली आहे. राज्यातील आगामी विधानसभा आणि स्थानिक स्वराज्य संस्थांच्या निवडणुकांच्या पार्श्वभूमीवर ही नियुक्ती महत्वाची मानली जात आहे.

रविंद्र चव्हाण यांच्या निवडीमुळे पक्षात नवचैतन्य येईल आणि भाजप राज्यात अधिक बळकट होईल, असा पक्षश्रेष्ठींचा विश्वास आहे.