For the first time in India, the She Paddle International Masters Women's Table Tennis Tournament is being organized in Goa from September 5 to 7. This was announced at a press conference.
गोवा : प्रसारमाध्यम वृत्तसेवा
भारतात पहिल्यांदाच ५ ते ७ सप्टेंबर दरम्यान गोव्यात शी पॅडल इंटरनॅशनल मास्टर्स महिला टेबल टेनिस स्पर्धेचे आयोजन होत आहे. ही स्पर्धा केवळ मास्टर्स महिलांसाठी समर्पित असलेली पहिली आंतरराष्ट्रीय बक्षीस स्पर्धा असून भारतासह परदेशातील ५० ते १०० महिला खेळाडू या भव्य सोहळ्यात सहभागी होणार आहेत.
स्पर्धेत विजेत्या खेळाडूला १.२५ लाख रुपयांची बक्षीस रक्कम व आकर्षक ट्रॉफी प्रदान करण्यात येणार आहे. पहिल्याच आवृत्तीत ४०+, ५०+ आणि ६०+ वयोगटातील महिला एकेरी, दुहेरी आणि प्रतिष्ठित सांघिक अजिंक्यपद स्पर्धा होणार आहेत.
दिग्गज खेळाडूंचा सहभाग
या स्पर्धेत ६० वर्षांवरील जागतिक विजेता मंतु मुर्मुर, माजी राष्ट्रीय विजेती, मास्टर्स राष्ट्रीय विजेती व राष्ट्रकुल पदक विजेती रीता जैन, जागतिक अजिंक्यपद स्पर्धेत रौप्यपदक विजेती व आठ वेळा मास्टर्स नॅशनल चॅम्पियन मंगल सराफ यांच्यासह अनेक नामांकित महिला खेळाडू सहभागी होणार आहेत. तसेच, बुखारेस्ट, रोमानिया येथील एक आंतरराष्ट्रीय खेळाडूदेखील या स्पर्धेची शोभा वाढवणार आहे.
‘ शी पॅडल ’
“ शी पॅडल ” या वार्षिक प्रमुख उपक्रमाची रचना मास्टर्स श्रेणीतील महिलांच्या ताकदीला, आवडीला आणि खेळावरील अमर प्रेमाला आदरांजली वाहण्यासाठी करण्यात आली आहे. “ही केवळ एक स्पर्धा नव्हे, तर महिलांच्या क्रीडा क्षेत्रातील योगदानाला सलाम करणारे आंदोलन आहे”, असे या उपक्रमाच्या निर्माती मुनमुन मुखर्जी यांनी सांगितले. गोव्याला मास्टर्स क्रीडा क्षेत्राचे जागतिक केंद्र म्हणून प्रस्थापित करण्यासाठी उचललेले हे महत्त्वाचे पाऊल असल्याचे आयोजकांनी स्पष्ट केले.
२०२६ मध्ये रोमानियात पुढची आवृत्ती
या स्पर्धेची पुढील आवृत्ती २०२६ मध्ये बुखारेस्ट (रोमानिया) येथे आयोजित केली जाणार असल्याचे आयोजकांनी जाहीर केले आहे. त्यामुळे ही स्पर्धा खऱ्या अर्थाने जागतिक महिला क्रीडा क्षेत्राचा उत्सव ठरणार आहे.
ऐतिहासिक पुस्तकाचे प्रकाशन
७ सप्टेंबर रोजी होणाऱ्या समारोप सोहळ्यात “स्मॅश हर स्टोरी” या ऐतिहासिक पुस्तकाचे प्रकाशन होणार आहे. १९४७ ते २०२४ दरम्यानच्या ३२ भारतीय राष्ट्रीय महिला चॅम्पियन्सना समर्पित हे पुस्तक शमिक चक्रवर्ती आणि दिलीप प्रेमचंद्रन यांनी लिहिले असून क्रीडा इतिहासकार बोरिया मजुमदार यांच्या मार्गदर्शनाखाली तयार झाले आहे. आयटीटीएफ अध्यक्षा आणि आयओसी सदस्य पेट्रा सोर्लिंग यांच्या पाठिंब्याने प्रकाशित होणारे हे पुस्तक खेळाडूंच्या कामगिरीसोबत त्यांच्या संघर्ष आणि प्रेरणादायी प्रवासाची कहाणी सांगते.
प्रेस कॉन्फरन्समध्ये मान्यवरांची उपस्थिती – पत्रकार परिषदेत दिग्गजांच्या उपस्थितीत स्पर्धेची घोषणा करण्यात आली.
मुनमुन मुखर्जी – माजी आंतरराष्ट्रीय खेळाडू, केअर फाउंडेशनच्या अध्यक्षा, पी३ स्पोर्ट्स मॅनेजमेंटच्या संस्थापक, चॅम्पियन चार्म्सच्या सह-संस्थापक
दीपा जैन – ज्येष्ठ राष्ट्रीय विजेती, NISH Jewels च्या संस्थापक व चॅम्पियन चार्म्सच्या सह-संस्थापक
शिल्पा जोशी टाकळकर – माजी आंतरराष्ट्रीय खेळाडू, शिवछत्रपती पुरस्कार विजेती व “स्मॅश हर स्टोरी” च्या सह-निर्माती
दीपक गोपाणी – संस्थापक सचिव व गोवा अनुभवी टेबल टेनिस असोसिएशनचे प्रवर्तक
विशेष अतिथी व समर्थकांमध्ये –
कमलेश मेहता – ८ वेळा राष्ट्रीय विजेता, अर्जुन पुरस्कार विजेता व टीटीएफआय सरचिटणीस
पूजा बेदी – अभिनेत्री व वेलनेस कोच
डॉ. गीता नागवेणकर – कार्यकारी संचालक, भारतीय क्रीडा प्राधिकरण
नीरज बजाज – अध्यक्ष, बजाज ग्रुप व कार्यक्रमाचे मुख्य प्रायोजक
सुदिन वरेकर (अध्यक्ष, गोवा टेबल टेनिस असोसिएशन) आणि मयूर सावकर (उपाध्यक्ष)
तसेच गोवा सरकारचे अनेक मान्यवर देखील उपस्थित होते.
“शी पॅडल” हा कार्यक्रम केवळ स्पर्धा नसून महिलांच्या खेळाबद्दलच्या आवडीला साजरा करणारा उत्सव आहे. जागतिक दर्जाच्या सामने, प्रेरणादायी कथा आणि खेळाच्या आत्म्याला नवा अर्थ देणारा हा सोहळा गोव्यात ५ ते ७ सप्टेंबरदरम्यान रंगणार आहे.
